តាមរយៈគណនីហ្វេសប៊ុករបស់លោក រ័ត្ន ស៊ីដាណង់ អភិបាលស្រុក មង្គលបុរី ខេត្តបន្ទាយមានជ័យ បានជម្រាបដំណឹងឱ្យដឹងថា នៅក្បាលព្រលប់ថ្ងៃទី ២២ ខែមករា ឆ្នាំ ២០២១ នេះ បុរសខ្មែរដែលទើបមកពីប្រទេសថៃម្នាក់
ឈ្មោះ ខា រិន អាយុ ២៣ ឆ្នាំ លេខទូរស័ព្ទ ០៦៧ ២៥០ ៩៦៤ មានអាសយដ្ឋាន នៅភូមិអូរសឿ ឃុំសឿ ស្រុកមង្គលបូរី បន្ទាយមានជ័យ បានលួចរត់ពីមណ្ឌលចត្តាឡីស័ក វិទ្យាល័យមង្គលបូរី ។
ទន្ទឹមនឹងនោះ បើតាមការបញ្ជាក់របស់លោក ជា ទី មេឃុំសឿ បានបញ្ជាក់ថា បុរសខាងលើនេះបានត្រលប់ពីប្រទេសថៃ តាមច្រកព្រំដែនក្នុងស្រុកម៉ាឡៃ នៅថ្ងៃទី ១៩ ខែមករា ឆ្នាំ ២០២១ ហើយត្រូវបានយកដាក់មណ្ឌលធ្វើចត្តាឡីស័ករយៈពេល ១៤ ថ្ងៃ
នៅម៉ាឡៃ ក្រោយមកក៏បានលួចរត់ តែត្រូវអាជ្ញាធរដឹង ក៏បានរាយការណ៍មកឃុំឱ្យប៉ូលិសប៉ុស្តិ៍ យកទៅដាក់មណ្ឌលចត្តាឡីស័កមង្គលបូរីវិញ នៅថ្ងៃទី ២០ ខែមករា ឆ្នាំ ២០២១ ។
ក្រោយមករំលងបាន ២ ថ្ងៃ នៅយប់ថ្ងៃទី ២២ ខែមករា ឆ្នាំ ២០២១ បុរសឈ្មោះ ខា រិន នេះ ក៏បានរត់ចេញពីមណ្ឌលចត្តាឡីស័កម្ដងទៀត ដោយពេលនេះខាងអ្នកជំនាញពាក់ព័ន្ធ កំពុងដុតដៃដុតជើង ស្រាវជ្រាវស្វែងរកបុរសខាងលើ មកធ្វើចត្តាឡីស័កឡើងវិញ ៕
