ខណៈកូវីដ១៩ ហាក់ធូរស្រាលបន្ដិច វៀតណាម ផ្ដើមព្រួយបារម្ហរឿង វីរុស D1V1 កើតលើសត្វបង្គា

ក្រោយ​មាន​ការ​ធូរស្រាល​ច្រើន​ពី​វីរុស​កូវីដ១៩ ប្រទេស​វៀតណាម បែរ​ផ្ដើម​ព្រួយបារម្ភ​ជា​ថ្មី ចំពោះ​ការ​កើត​ឡើង​នៃ​វីរុស D1V1 ។ វីរុស D1V1 ឬ​ហៅ​ថា decapod iridescent virus 1 គឺ​ជា​វីរុស​កើត​មាន​ឡើង​លើ​សត្វ​បង្គា ប៉ុន្តែ​មិន​មាន​ព័ត៌មាន​បញ្ជាក់​ថា វា​អាច​ឆ្លង​មក​មនុស្ស​ឬ​ក៏​យ៉ាង​ណា​នោះ​ទេ ។

ទោះ​ជា​យ៉ាង​ណា​ក៏​ដោយ ការ​ព្រួយបារម្ភ​នៅ​តែ​មាន​លើ​វីរុស​នេះ ដោយ​សារ​តែ​វា​មាន​ការ​ប៉ះពាល់​ខ្លាំង​លើ​វិស័យ​អាជីវកម្ម​បង្គា​ក្នុង​ប្រទេស​របស់​ខ្លួន ។ D1V1 Virus ត្រូវ​បាន​ឲ្យ​ដឹង​ថា ជា​ជំងឺ​ឆ្លង​ខ្លាំង​បំផុត​លើ​សត្វ​បង្គា ហើយ​អត្រា​ងាប់​នៃ​វីរុស​នេះ​លើ​បង្គារ​ក៏​ខ្ពស់​ណាស់​ដែរ ។

បើ​តាម​សារព័ត៌មាន South China Morning Post បាន​ឲ្យ​ដឹង​ថា វីរុស​នេះ រក​ឃើញ​ដំបូង​ក្នុង​ឆ្នាំ ២០១៤ ហើយ​ចាប់​តាំង​ពី​នោះ​មក កសិករ​ចិញ្ចឹម​បង្គា​ជាច្រើន​មាន​ការ​ព្រួយបារម្ភ​ជាខ្លាំង​ចំពោះ​សេដ្ឋកិច្ច​ខ្លួន ប្រសិន​បើ​វា​មានការផ្ទុះ​ឡើងនោះ ។

តាម​សារព័ត៌មាន​ដដែល​នេះ​បាន​បញ្ជាក់​ដែរ​ថា កសិដ្ឋាន​ចិញ្ចឹមបង្គាមួយនៅក្នុងប្រទេសចិន បានរងការខាតបង់ទឹកប្រាក់រាប់ម៉ឺនដុល្លារ ដោយសារតែវីរុសនេះ ។

«ក្នុង​ពេល​ត្រឹម ២ ទៅ ៣ ថ្ងៃ ចំនួន​សត្វ​បង្គាក្នុង​ស្រះ​ទាំង​អស់​នឹង​ត្រូវ​ងាប់ ប្រសិន​បើ​បង្គារ​មួយ​ក្បាល​ណា​មាន​វីរុស​នេះ» ។

អ្វី​ដែល​អាក្រក់​ជាង​នេះ​ទៀត​គឺ​ថា វីរុស D1V1 គឺ​ឆ្លង​ទៅ​លើ​បង្គាគ្រប់​ទំហំ មិន​ថា​ទាំង​បង្គានៅ​តូច ឬ​ធំ​ពេញ​រូបរាង​ឡើយ ដែល​ជា​ហេតុ​ធ្វើ​ឲ្យ​វិស័យ​សេដ្ឋកិច្ច​កាន់​តែ​ដុនដាប​សម្រាប់​អ្នក​ចិញ្ចឹម​បង្គា ។

គួ​បញ្ជាក់​ថា រោគ​សញ្ញា​នៃ​វីរុស D1V1 លើ​សត្វ​បង្គានេះ អាច​ចាប់​អារម្មណ៍​បាន​តាម​រយៈ​សំបក​បង្គា ដែល​ប្រែ​ពណ៌​ទៅ​ជា​ក្រហម និង​ប្រែ​ជា​ទន់ មុន​ពេល​បង្គា​ទាំង​នោះ​លិច​ងាប់​ធ្លាក់​ចុះ​ទៅ​បាត​ស្រះ ។

លោក Phùng Đức Tiến អនុរដ្ឋមន្ត្រី ក្រសួង​កសិកម្ម និង​អភិវឌ្ឍ​ជនបទ​បាន​ប្រកាស​ហាម​មិន​ឲ្យ​មាន​ការ​ធ្វើ​អាជីវកម្ម​ខុស​ច្បាប់​លើ​ពពួក​កំពិស និង​បង្គាទាំង​អស់ ដើម្បី​បញ្ចៀស​ការ​នាំ​យក​វីរុស​នេះ​ចូល​ប្រទេស​របស់​ខ្លួន ។
ទោះ​បី​ជា​កំពុង​មាន​ការ​ព្រួយបារម្ភ ប៉ុន្តែ​បច្ចុប្បន្ន​ប្រទេស​វៀតណាម​នៅ​មិន​ទាន់​មាន​រក​ឃើញ​ការ​ផ្ទុះ​ឆ្លង​វីរុស​នេះ​នៅ​ឡើយ​ទេ ៕

ប្រភព៖ WorldOfBuzz

Leave a Reply